حچي جروحي)) للشاعر أحمد الخزاعي
لا منطي بصديج ولا خذت غيبه
بارد شيبت گالوا شبيك إبساع
وامداوي أذية الناس بالطيبه
گلت الماي بارد والثلج شيبه
من شفت الحجي صار أرخص من الماي
هي الدله توگف والتفور الروح
الباب الينقفل محد عرف عيبه
ياكل بالخشب غم عيشة المنشار
ساكت والصور ماتحجي بس هيبه
شنو عِلوه النهر يمشي أعله جرح الگاع
وچفوف البضهره تدفعه وتجيبه
شاف البير ناصي وصعد ترتيبه
تره الخالي غرض ركظة حصاده الناس
وظميت الحجي وغالي السعر مضموم
البيرغ ينفگد بس ساعة النيبه
إذا ثگلن أحبهن وأنتجي أعله اليل
وأجلبهن بروحي أثنعش تجليبه
والفارغ خفيف وبس هوه بجيبه
وماحصل مجيله ويرجع بخيبه
وأصفن بالحجي بس صفنت القناص
مركز عالهدف لوثارت يصيبه
من ثگله وشمرته أمبين المتروس
خيط العنكبوت شحجه وقنعوا بيه
الجرس ساكت ادب بس يحجي من ينداس
والصادق محمد ليش تكذيبه
الذيب الضل عدل يوسف الگالو مات
طلع يوسف عدل بس مالگو ذيبه
وگظه عمره اليغش وأيامه بالريبه
خالف تعرف وينبني بناسك صيت
هوه اليحجي حگ بالهوكت مكروه
والهاون لطم بس هذا ترحيبه
شگد ذمو الخنجر أعوج ولبسوه
ومن تسألهم يگولون تركيبه
شنو ذنبه إندفن وي ميت الكافور
تره بس إسمه كافر ليش تعذيبه
وشيخ الباطل بياوجه تنصيبه
الشاعر احمد الخزاعي
اترك تعليقا:
